Fólk orðið þreytt á springandi blöðru? Get trúað því. Það er ekki það að ég hafi ekkert að segja, finnst bara skemmtilegra að lesa um það sem aðrir eru að gera. En já. Ætli maður hripi ekki niður nokkrar línur, um hvað á mína daga hefur drifið.

Veðurstofa Hollands, veðurspá. Gert er ráð fyrir stormi. Stormurinn mun standa yfir í tvo daga, og feykja öllu lauslegu um. Hjól skulu læst við hluti. Regnföt skulu notuð. Byrgið ykkur upp af heitu kakói og góðu lestrarefni því þið munur ekki vilja fara út fyrir hússins dyr. Enda ekki hundi út sigandi. Slagviðrið eykur krafta sína í námunda við háhýsin í hverfinu hennar Unu í Delft, og munu lætin jaðra við verstu óveður á Íslandi.

En nú að öðru.

Fór til Antwerpen í Belgíu um daginn. Já, nú er maður búinn að bæta einu landinu við listann af löndum heimsóttum. Klukkutíma lestarferð. Ekki að sjá mikinn mun á löndunum. Nema þá að við drógum þá ályktun að Belgar sýndu ríkidæmi sitt á auðsjáanlegri hátt en Hollendingar. Við sáum ótrúlegan fjölda af fínum dýrum bílum, en sáum líka slömmin og ákváðum að það væri meiri munur á stéttunum þar. Tókum upp veskin og slógumst í för með ríka fólkinu, versluðum og röltum um í fína vetrarveðrinu.

Jólaverslunin að hefjast og allir (í ríka hverfinu) glaðir að sjá. Þegar við fórum í slömmin, með H&M poka, Camper poka og Puma poka leið okkur ekki eins vel. Samviskan alveg að drepa mann og ekki laust við að örlítil hræðsla hafi gert vart við sig. Minntist allt í einu óeirðanna sem hafa verið í Frakklandi og að sögn íslenskra fjölmiðla höfðu einhverjir bílar í Hollandi og Belgíu einnig orðið eldi að bráð. Gengum því rösklega aftur í átt að velmeguninni þar sem við stóðum ekki út úr eins og endurskinsmerki. Verslunarvíman var því fljótlega farin af okkur. Hugguðum okkur með því að fara út að borða og svo í bíó! Já hún er viðstödd þessi samviska manns. En hvernig ég læt hana stýra mér er ekki víst að sé neinum til góða.

Skólinn á fullu sem endranær. Ritgerðir og stúdíóverkefni. Kennaranum mínum finnst við almennt vera að taka of langt jólafrí, þar sem kynningar og próf séu eftir jól. Ég kem heim 20. des og fer aftur 10. jan. Ég er enn að meta hvort ég eigi að breyta miðunum og borga fullt af peningum, eða bara láta þetta flakka og vinna að heiman að verkefnunum í jólafríinu.

Agnes kom í stutt stopp frá Barcelona á föstudaginn. Hún var á leið á tjúttið í Amsterdam og Utrect og kom við hjá mér. Skoðuðum bókasafnið og skólahverfið, fórum út að borða og spjölluðum. Hún er víst eitthvað sár í bossanum eftir að dúsa á bögglaberanum.

Þórir og Jóhanna Kristín koma á morgun! Hlakka að sjálfsögðu mikið til að sjá þau. Vona bara að storminn muni lægja áður en þau lenda.

Nóg í bili, vonandi styttra bili en síðast.

Gleðilega jólaverslun, en munum eftir þeim sem hafa það ekki eins gott.

Um daginn fórum við að ræða hvers við sökuðum. Ég sagðist sakna þess að liggja í góðum sófa og horfa á góða mynd og borða popp. Töluðum svo um kvikmyndir í þrjá tíma. Daginn eftir fórum við nokkur í IKEA, og mátuðum hvern sófann á fætur öðrum. Sátum kannski hálftíma í einum þeirra og létum okkur dreyma. Svo var ákveðið að í kvöld skyldi verða kvikmyndakvöld. Hittumst fimm heima hjá Hendrik, allir komu með sængurnar sínar og kodda. Hrúguðum því öllu á gólfið og lágum á þessum heimatilbúna sófa, borðuðum snakk og nammi og horfðum á tvær myndir. Kósýkvöld eins og AÞ myndi segja. Ekkert popp þó. Það er HÆTT að selja poppmaís. Bara til örbylgjupopp og þar sem ekkert okkar á ofn, þá varð ekkert úr poppátinu.

Í gær fórum við heim til Gosiu frá Póllandi. Hún leigir herbergi í svona alvöru húsi, ásamt tveimur hollenskum stelpum. Við elduðum heima hjá henni, eldamennskan stóð yfir frá 20 - 24. Svo mikið gekk á í eldhúsinu. Stofan heima hjá henni er sú minnsta sem ég hef komið inní. 2m x 2m. Þar inni vorum við 12. Svo var annar eins fjöldi í eldhúsinu og á ganginum og herberginu hennar. Hvar sem við komumst fyrir. Heimasætan var dugleg að hella oní okkur pólskum drykk, sem hún bar fram í tugatali. Sætur vodki, trönuberjasafi og dash af Tabasco. Sterkt!! Hún þurfti auðvitað að smakka drykkina til...enda fór það svo að hún drapst á miðnætti, gestgjafinn sjálfur. Pökkuðum henni inn í sæng, settum fötu við rúmið og héldum áfram að djamma.
Stofuliðið
Stofuliðið
Eldhússliðið með heimasætuna í forgrunni
Svo brenndi ég mig á diski, sem hafði staðið utan í kerti allt kvöldið. Ég hafði því ríka ástæðu til að halda á köldum bjór það sem eftir lifði kvöldsins. Svo í dag er blaðran búin að vera að stækka og stækka, gjörsamlega að fara að springa. Svo ég tilkynnti að " my bladder is almost bursting!" búin að gleyma því að ólíkt íslenskunni þá eru tvö ólík orð fyrir þvagblöðru og blöðrusár í enskunni. Bladder og blister. Þeim þótti þetta óþarflega persónulegar upplýsingar, að ég skyldi segja þeim að blaðran mín væri að springa.

Annars er það í fréttum að það er ekkert í fréttum. Hollendingar ekkert byrjaðir að skreyta ennþá. Nema í Ikea. Jólin þó á næsta leyti og ég hef grun um að verslunargenið sé að lifna við í hollendingum. Búðir eru að fyllast og mikill hamagangur. Þeir gefa sína pakka 5. des, sem er Sánkti Nikulásarmessa. Fór á markaðinn í Delft í dag, smakkaði síld í pulsubrauði. Skyndibitann hér í Hollandi. Í næstu viku er midterm-kynning á stúdíóverkefninu okkar. Erum enn að kanna gróðurhús, farin að koma með hugmyndir um hvernig blanda megi saman gróðurhúsum, íbúðarhúsum og hraðbraut á sælands(polder)-svæði. Mjög skemmtilegt verkefni... finnst ykkur það ekki líka? :)

Jú auðvitað, aðalfréttin sem skiptir mitt daglega líf gríðarlega miklu máli og mun hafa afleiðinar... hjólið mitt er bilað! GRENJ!
Bara gerðist eitthvað... og nú get ég ekki snúið pedölunum heilan hring, eitthvað fast á afturhjólinu, enginn veit hvað þetta er. Og fyrr en við vitum hvað er að, getum við ekki lagað það... eða reynt að laga það. Djö! Þarf að finna hjólaviðgerðamann, og hver hefur tíma í svoleiðis, ég bara spyr...

Þrjár vikur í komu Lækjarsmárahjónaleysanna!